【もっと知りたい】

tenpo mi open e oko mi tan lape lon ma kasi pimeja mute la
mi sona ala e ale.

tenpo ni la mi kama lon kulupu ni tan jan sona pi nasin mi.
tan ni la mi kama sona e sina.

sina pilin pona tan ni: sina moku e kon seli pi kasi moli.
mi sona ala e ona tan ni: mi moku ala e ona.
taso mi kama sona e nimi pona ona tawa sina tan ni: mi lukin e sina.

mi en kulupu mi li tawa ma pilin sina.
ma pilin sina li sama ma utala pi tenpo pini sina.

mi sona ala e utala ni.
taso mi kama sona e ni:
utala pini sina li pana awen e ike tawa sijelo sina en pilin sina
tan ni: mi lukin e ona lon ma pilin sina.

tenpo pini la sina toki pona tawa jan ale
tan ni: sina wile ala open e utala toki.

mi sona ala e pilin sina lon insa toki
tan ni: mi toki lili taso poka sina lon tenpo ona.
taso mi kama sona e sinpin pona sina pi pilin musi tan tenpo mute.

tenpo mi luka e sina la sina toki e ni: o luka ala.
mi sona ala e pilin sina lon tenpo ona
tan ni: mi pilin e ni: sina pilin ike tawa luka mi.

taso mi kama sona e pilin sina len:
tenpo mi luka e sina la sina toki sama ike
taso sina weka ala e mi.
sina pilin monsuta e wawa luka sina.

tenpo mi toki kepeken pilin olin tawa sina la
sina weka e sinpin sina.

mi kama sona lili e nimi ona:
tan ni: kute sina lon lukin mi li kama loje.

mi kama sona e pilin mi ni:
sina suwi tawa mi.

mi sona ala e mute.
taso mi kama sona tan tenpo.

tan ni la mi wile e ni:
mi kama sona mute e sina.

【愛と平和】

"mi kama pana e pona tawa ma lon nimi pi olin en pona, a!"

lon tenpo pini lili la mi kute e ni
tan monsuta sama jan meli lili pi lukin suwi.

taso ona li pakala e ma poka ona, e ma lili pi pona,
kepeken wawa monsuta lon insa ona.

tan ni la ona li wile e ni:
lon ma pona ala la jan mute li wile e ona tan olin en pona.

wile ona li ijo pi awen lon.
mi lukin e wile ona la mi kama sona e sina.

sina toki ala. taso, mi pilin e ni:
ken la sina wile lon ma seme, anu lon kulupu seme, lon poka jan seme.

taso sina pilin e ni:
tan luka mi ni la mi ken ala lon ma ona.

"o moli e mi... wile mi li moli mi..."

tenpo pini lili la mi kute e ni tan sina.

tenpo ona la sina pakala e ma lon poka sina
tan wawa sama monsuta lon luka sina lon insa sina,
kepeken ala wile sina.

tenpo ona la wawa sama monsuta lon luka sina li len en laea e sijelo sina.
taso, wawa ona li awen ala lon, li weka tan jan kulupu sina.
tan ni la, sina moli ala.

tenpo ni la mi pilin e ni:
monsuta sama jan lili suwi en sina li sama lili.

ona tu li pakala e ma kepeken wawa monsuta tan insa ona tu.

wile ona tu li lukin sama.
taso wile ona tu li ante.

tan ni la
toki pi wile monsuta suwi li pilin ala e ale tawa mi,
sama toki pi tan ala.

taso
toki pi wile sina li pilin ike lili tawa mi,
sama kama lete pi oko telo.

sina pilin e ni:
lon ma pi olin en pona la mi ken ala lon ma ona.

taso pilin sina li toki:
mi wile ala pakala e ma ona.

tan sina wile e ni la mi wile awen lon poka sina.
tan ni: sina awen moli ala.
mi wile e ni: sina kama wile ala e moli sina lon tenpo kama lon poka mi.

ken la nimi pi olin en pona li pona.
ken la utala tan nimi pi olin en pona li pona.

taso mi pilin pona mute tawa ni: sina toki ala e olin en pona, taso sina jo e pilin.

【過ぎ去った日々】

tenpo pini li tenpo weka tan mi.
taso tenpo ona li awen pakala e pilin mi.

lon ma ante la ken la mi sona ala e tenpo ona.
ni li ken kama pona tawa mi.

taso mi sona e ni:
mi wile e ni, taso ma ante li lon ala tawa mi pi lon ma ni.

tan ni la mi wile awen moli ala
lon poka tenpo pini mi pi pakala awen.

tenpo ni li lon poka mi.
tenpo ni li ike ala tawa mi, tan ni: sina lon poka mi, mi ken lon kulupu ni.

kin la tenpo ni li weka tan mi
li ante tawa tenpo pini mi.

ken la mi wile e ni:
tenpo ni li ante e pona tawa mi pi tenpo kama.

【月夜】

tenpo pimeja ni la ma ni li kalama ala.
ma ni li awen taso lon tenpo.

mi lukin e mun lon sewi pimeja.
ni la mi kama pilin e pilin pini mi.
pilin pini ni li tan tenpo pini pi mi lukin e mun lon poka sina kin.

tenpo pini ona la ma li kalama ala kin sama tenpo ni.
taso sina lon poka mi.
sina moku e kon seli pi kasi moli.

ni la mi lukin e kon seli tawa sewi, e sina.
mi sona e ni: lukin sina lon tenpo ona li lukin pona mute sama walo lili tan suno mun.

tenpo ona la lete li lili,
taso mi pilin lete ala tan mi pilin e seli sijelo sina lon poka mi.

tenpo ni la sina lon poka mi ala. sina lon tomo misikeke tan tenpo utala pini.
suno mun li pana e suno walo tawa mi taso.

mi kama wile e ni: sina kama pona e sijelo sina.
en tenpo kama la mi lukin e mun lon poka sina kin.

tan ni: ma ni pi sina lon ala la suno mun li lete lili tawa mi.

【たった1つの希望】

nasin mi li awen ike mute tan tenpo pini tawa tenpo ni.
mi pilin e ni:
sijelo mi li ante lili tan pali mama mi.
tan ni la mi ken ala lawa e nasin mi.
mi sama ijo lon insa luka mama mi.

lon tenpo pini la mama mi li toki tawa mi e ni:
o kipisi e ona.

ona li sama kili loje.
ona li lon insa jan.

tan ni la mi kipisi e loje ona.
pilin mi li wile ala, taso luka mi li utala kipisi e ona.
ona li pakala li kama sama lupa, li pana e telo mute tawa ma anpa.

lon tenpo ni la mi weka e mama mi, taso mi pilin awen e ona.
lon tenpo pimeja la mi pilin monsuta e luka mama mi
lon insa lili pi lawa mi.

mi open e lupa tomo mi la mi lukin e ma utala pi tenpo pini mi.
ma utala ni li sama ma lape ike.
ona li lon ala, taso mi pilin e ona sama lon.

mi kute e kalama ike tan jan mute pi utala.
tan ni la mi pilin sama mi tawa anpa lon insa pimeja.

mi kama kute e kalama pi ilo tenpo.
kalama ona li kalama sina, li toki sina.

lon tenpo pini lili la sina toki e ni:
o kipisi e ona.

ona li pimeja.
ona li sama kon li len e jan pi kulupu mi.

sina wile e ni:
luka mi li pakala e pimeja.
sina wile tawa nasin pi tenpo kama lon poka kulupu mi.
sina pilin e ni: mi ken pakala e ona.

tenpo ona la mi kipisi e pimeja.
mi wile e ken tan wile sina.


lon tenpo pini en lon tenpo kama kin la ma pilin mi li ike sama ma moli.

taso tenpo ni taso la mi kute ala e kalama utala lon tomo mi.
tan ni la mi jo lili e toki sina en pilin sina tan sina.

ona li sama sona lili wan tawa mi
lon ma ni ike sama pimeja.