【月夜】

tenpo pimeja ni la ma ni li kalama ala.
ma ni li awen taso lon tenpo.

mi lukin e mun lon sewi pimeja.
ni la mi kama pilin e pilin pini mi.
pilin pini ni li tan tenpo pini pi mi lukin e mun lon poka sina kin.

tenpo pini ona la ma li kalama ala kin sama tenpo ni.
taso sina lon poka mi.
sina moku e kon seli pi kasi moli.

ni la mi lukin e kon seli tawa sewi, e sina.
mi sona e ni: lukin sina lon tenpo ona li lukin pona mute sama walo lili tan suno mun.

tenpo ona la lete li lili,
taso mi pilin lete ala tan mi pilin e seli sijelo sina lon poka mi.

tenpo ni la sina lon poka mi ala. sina lon tomo misikeke tan tenpo utala pini.
suno mun li pana e suno walo tawa mi taso.

mi kama wile e ni: sina kama pona e sijelo sina.
en tenpo kama la mi lukin e mun lon poka sina kin.

tan ni: ma ni pi sina lon ala la suno mun li lete lili tawa mi.

【たった1つの希望】

nasin mi li awen ike mute tan tenpo pini tawa tenpo ni.
mi pilin e ni:
sijelo mi li ante lili tan pali mama mi.
tan ni la mi ken ala lawa e nasin mi.
mi sama ijo lon insa luka mama mi.

lon tenpo pini la mama mi li toki tawa mi e ni:
o kipisi e ona.

ona li sama kili loje.
ona li lon insa jan.

tan ni la mi kipisi e loje ona.
pilin mi li wile ala, taso luka mi li utala kipisi e ona.
ona li pakala li kama sama lupa, li pana e telo mute tawa ma anpa.

lon tenpo ni la mi weka e mama mi, taso mi pilin awen e ona.
lon tenpo pimeja la mi pilin monsuta e luka mama mi
lon insa lili pi lawa mi.

mi open e lupa tomo mi la mi lukin e ma utala pi tenpo pini mi.
ma utala ni li sama ma lape ike.
ona li lon ala, taso mi pilin e ona sama lon.

mi kute e kalama ike tan jan mute pi utala.
tan ni la mi pilin sama mi tawa anpa lon insa pimeja.

mi kama kute e kalama pi ilo tenpo.
kalama ona li kalama sina, li toki sina.

lon tenpo pini lili la sina toki e ni:
o kipisi e ona.

ona li pimeja.
ona li sama kon li len e jan pi kulupu mi.

sina wile e ni:
luka mi li pakala e pimeja.
sina wile tawa nasin pi tenpo kama lon poka kulupu mi.
sina pilin e ni: mi ken pakala e ona.

tenpo ona la mi kipisi e pimeja.
mi wile e ken tan wile sina.


lon tenpo pini en lon tenpo kama kin la ma pilin mi li ike sama ma moli.

taso tenpo ni taso la mi kute ala e kalama utala lon tomo mi.
tan ni la mi jo lili e toki sina en pilin sina tan sina.

ona li sama sona lili wan tawa mi
lon ma ni ike sama pimeja.

【欲望】

uta mi li open lili sama wile kon sin tan ni:
sina pana e seli tawa mi.

seli sina li sama ni:
seli mute li kama tawa mi.

tan ni la pilin mi lon insa li kama telo sama ko.
ko seli li kama telo.
ko kiwen li kama telo.
ko li tawa anpa tan wawa ma.

ona li kama telo mute, mi ken ala lawa.

seli li ante mi tawa telo la, mi pilin taso e ni:
mi wile poka sina,
mi wile mute e sina.

tenpo ni la ale li kama telo tan seli sina.
wile ni taso li ale tawa mi.

mi ken ala lawa e ale,
mi ken ala toki e ale.
tan ni la mi toki awen taso,
sama ni: mi kalama lili e nimi sina kepeken wile mi.

【小さな命】

あとで書く

【Love you】

mi en sina li jan olin tu.
mi en sina li pilin pona lon poka jan wan, li luka e jan wan, li jo e tenpo pi jan tu.

taso, mi en sina li toki ala e olin tawa jan wan.
tan ni la toki ala li lon.

ken la jan tu li pilin e ni taso:
mi toki ala, taso sina sona e ni.

ni li pona tawa mi en sina. ni li lon ala lon?

tenpo ni la sina taso li lon poka mi.
tan ni la tenpo ni li tenpo olin pi jan tu.

luka sina li kama lon luka mi, li luka lili e luka mi,
sama ni: sina lukin lili e mi, li len lili e pilin sina.

luka mi li jo e luka sina kepeken wawa lili la uta sina li weka lili e kon,
sama ni: sina wile e ijo tan pilin sina tawa mi.

luka tu li sama wan, sama wile weka ala, sama linja li ante e sike
tan pilin pi jan tu.
taso, jan tu li toki ala e pilin ni.

sina lukin e luka tu ni la oko sina li kama lili, li kiwen ala tan pilin pona sina.

mi lukin e sina la mi pilin lili e ni:
mi toki ala e pilin olin, taso ona li jo ala e tan.

mi ken toki e ona lon tenpo pini en tenpo ni.
ken la mi wile e ona.
tan ni la mi toki tawa sina:

“mi pilin pona tawa sina.”
“a... mi sona e ona.”
“la sina sona e ni: mi pilin olin e sina.”
“a... mi s..., ala...”

tan toki mi la sina kama lukin e sinpin mi.
tan ni la mi lukin e sinpin sina pi kama loje.
uta sina li weka e kalama kipisi pi toki ala.
mi lukin e sina la mi pilin suwi tawa sina.

mi toki e pilin mi en mi lukin e sina suwi la wile sin mi li kama lon.

“sina o toki e pilin sina, ken anu seme?”
“a? n, mi kin o toki? ni li...”

sina toki ala la luka sina li kama wawa lili, li wile weka tan mi.
tan ni la luka mi li kama wawa mute tan wile weka ala.

“... luka li sama pakala.”
“ni li ike tan mi. taso mi ken ala weka.”
“n..., sina pali e ni tan ni: mi toki ala?”
“ala, tan ni: mi pilin olin e sina la mi wile weka ala tan sina.”
“aaaa... sina o toki ala e ale lon tenpo lili.”

sina wile len e sinpin sina pi loje mute.
taso luka mi li awen jo e luka sina la sina lukin anpa.

mi ken ala lukin e sinpin sina.
taso, mi ken lukin e kute sina: kute sina li loje mute sama seli.
mi pilin lili e ni: mi ike tawa sina tan musi.

tan ni la luka mi li wile weka e luka sina.
tenpo ni la sina kama poka e sijelo mi tan sinpin.

mi sona ala e tan pali sina la sijelo mi li kama kiwen.
tenpo ni la mi kute e toki lili tan sina lon anpa:

“...mi olin e sina...”

toki ni li lili lili sama walo, taso toki ni li nimi suli tawa mi sama utala luka.

“a... mi sona e ni.”

mi toki e ni sama mi lon tenpo awen.
taso, sina kama sona e ni:
kalama mi li kiwen,
seli pi sijelo mi li seli mute,
pilin insa sijelo mi li tawa mute,
tan toki sina.

taso, mi kama sona e ni:
sina kin li sama mi.

tenpo ni la mi en sina li toki ala e ijo ale, li pilin e seli en lon pi jan wan.
luka sina li lon luka mi li kama wawa la luka mi kin li kama sama.